Programa Oportunius

O Programa Oportunius é unha iniciativa promovida pola Xunta de Galicia, coa colaboración do Sistema Universitario Galego (SUG), o Consejo Superior de Investigaciones Científicas (CSIC) e os organismos de investigación de Galicia (aos que o programa está aberto para a súa incorporación), para ofrecer condicións atractivas que permitan atraer e reter talento investigador de primeiro nivel.

O seu obxectivo é xerar oportunidades para persoal investigador excelente que queira desenvolver a súa carreira científica en Galicia reforzando as opcións de acceso e os beneficios asociados ás axudas do European Research Council – ERC.

O fin último é facilitar a estabilidade do mellor persoal investigador galego e atraer outro persoal científico excelente de fóra de Galicia.

O programa ofrece un itinerario deseñado á medida de tres perfís:

• Gañadores ERC. Paquete de axudas complementarias ao financiamento europeo, a través da opción a un contrato de persoal investigador distinguido e de recursos económicos para apoiar a súa actividade investigadora.

• Finalistas ERC. Apoio económico e servizos de formación, asesoramento e revisión de propostas para aumentar as garantías de éxito nas seguintes convocatorias do ERC.

• Candidatos ERC. Formación e asesoramento experto ao persoal investigador distinguido cun alto potencial e unha carreira investigadora prometedora para que participen nas convocatorias do ERC.

Ata abril de 2022 Oportunius facilitou:

• 9 contratos Oportunius a gañadores ERC.
• 25 gañadores ERC apoiados.
• 32 proxectos financiados polo ERC.
• 17 finalistas ERC apoiados.
• 148 candidaturas ao ERC avaliadas.
• 16 talleres de formación con máis de 330 participantes.

O Programa Oportunius contempla o establecemento dun Consello Asesor formado por profesionais expertos de recoñecido prestixio e integrado pola Consellería de Cultura, Educación e Universidade; a Vicepresidencia segunda e Consellería de Economía, Empresa e Innovación –á que se adscribe a Axencia Galega de Innovación–; as tres universidades, o Consejo Superior de Investigaciones Científicas (CSIC) e o persoal investigador ERC para o traballo conxunto e aliñado co logro dos obxectivos do programa.

Máis información dispoñible no folleto do Programa Oportunius:

• Folleto en galego (pdf)
• Folleto en castellano (pdf)
• Brochure in english (pdf)