GAIN difunde as oportunidades de financiamento da I+D+i en Europa

2014-05-05
  • O programa europeo Horizon 2020 conta con preto de 80.000 millóns de euros de orzamento para financiar proxectos de I+D+i
  • Cada xornada estará centrada nun ámbito temático ou sector e terá un carácter práctico

A Axencia Galega de Innovación (GAIN), en colaboración co Centro para el Desarrollo Tecnológico Industrial (CDTI), está organizando un ciclo de xornadas de presentación das oportunidades de financiamento que ofrece Horizon 2020, o programa da Unión Europa dirixido a financiar a I+D+i no periodo 2014-2020 que conta cunha dotación orzamentaria de preto de 80.000 millóns de euros.

As oito xornadas, que comezarán o vindeiro 7 de maio e se estenderán até o outono, están dirixidas a todos os axentes do Sistema Galego de Innovación (empresas, centros tecnolóxicos, grupos de investigación, así como calquera persoa interesada en participar en programas europeos de I+D+i), especialmente ás PEMEs, co obxectivo de explicar as principais claves para concorrer con éxito a estes fondos e os apoios cos que contan por parte da administración galega para a elaboración das propostas.

Especialización temática e carácter práctico

Cada xornada está centrada nun ámbito temático ou sector, abordando así dende a seguridade alimentaria ou o sector naval até o novo modelo industrial ou as PEMEs. O carácter das xornadas será eminentemente práctico e os asistentes que o desexen poderán manter unha xuntanza bilateral tanto con representantes de CDTI como de GAIN para valorar unha posible proposta de proxecto e aclarar dúbidas sobre os instrumentos de apoio á participación galega en proxectos europeos de I+D+i, respectivamente.

A relación de xornadas programadas é a seguinte:

  • Sociedades seguras. 7 de maio de 2014. Santiago de Compostela (videoconferencia con Ferrol, Lugo, Ourense e Vigo)
  • Transporte intelixente, ecolóxico e integrado. 13 de maio de 2014. Ferrol (videoconferencia con A Coruña, Lugo, Ourense, Santiago de Compostela e Vigo)
  • Industria Naval (feira Navalia). 21 de maio de 2014. Vigo
  • Instrumento PEME. 3 de xuño de 2014. Santiago de Compostela (videoconferencia con A Coruña, Ferrol, Lugo, Ourense e Vigo)
  • Seguridade alimentaria. Outono 2014. Ourense (videoconferencia con A Coruña, Ferrol, Lugo, Santiago de Compostela e Vigo)
  • Envellecemento activo e saudable. Outono 2014. Santiago de Compostela (videoconferencia con A Coruña, Ferrol, Lugo, Ourense e Vigo)
  • Novo modelo de industria galega mediante tecnoloxías facilitadoras. Outono 2014. Ferrol (videoconferencia con A Coruña, Lugo, Ourense, Santiago de Compostela e Vigo)
  • Tecnoloxías da Información e da Comunicación. Outono 2014. Vigo (videoconferencia con A Coruña, Ferrol, Lugo, Ourense e Santiago de Compostela)

O programa completo das xornadas, así como o lugar e hora de celebración e o acceso aos formularios de inscrición están dispoñibles nesta ligazón