O equipo da área de talento e transferencia da Axencia Galega de Innovación intégrase nas instalacións do CIFP Ferrolterra para fomentar a I+D+i

• A directora xeral de FP e a directora da Axencia Galega de Innovación poñen en valor esta colaboración en innovación e emprendemento no tecido empresarial da comarca

Ferrol, 17 de xullo de 2025.- A directora xeral de Formación Profesional, Eugenia Pérez, e a directora da Axencia Galega de Innovación, Carmen Cotelo, visitaron hoxe o Centro Integrado de FP Ferrolterra para coñecer as novas instalacións da Axencia Galega de Innovación. Seis persoas da área de talento e transferencia deste departamento desenvolverán desde alí tarefas vencelladas coa captación e retención de talento investigador, a transferencia de coñecemento e o posicionamento internacional do ecosistema galego de I+D+i.

A directora da Axencia apuntou que a “presenza deste equipo en Ferrolterra contribuirá ao fomento da I+D+i no tecido empresarial da comarca e ofrece proximidade aos axentes de coñecemento da contorna”. Ademais, a súa localización nun centro de FP permitirá colaborar no “fomento do emprendemento innovador e da transferencia de coñecemento do centro ás empresas da zona, así como no desenvolvemento de iniciativas conxuntas no marco de proxectos europeos”, sinalou a directora xeral de FP.

Entre as actividades encomendadas a este equipo, atópase a xestión da convocatoria Doutoramentos Industriais que promove a realización de teses doutorais en empresas e centros tecnolóxicos, fortalecendo os vínculos entre a universidade e a empresa e mellorando as capacidades de I+D+i das empresas.

Ademais, desenvolverán outras actividades vinculadas co talento investigador como a promoción do programa Oportunius, o programa Marie Skodowska-Curie Actions ou a difusión internacional de Galicia como destino para desenvolver a carreira investigadora entre os investigadores españoles no estranxeiro. No ámbito da transferencia de coñecemento, participarán na xestión do programa Ignicia e de proxectos europeos como o proxecto PICOBELLO.