Smart Agri Connect 2026: encontro internacional B2B para o sector agrícola

Data: 9-18 de setembro de 2026
Modalidade: presencial e en liña
Inscrición: aberta ata o 18 de setembro de 2026
Enlace: https://www.b2match.com/e/smart-agri-connect-2026

A Axencia Galega de Innovación, como membro da Enterprise Europe Network a través do consorcio EEN-GalacteaPlus, participa como entidade coorganizadora en Smart Agri Connect 2026, un encontro internacional de matchmaking que se celebrará do 9 ao 18 de setembro de 2026 e que facilitará o contacto entre empresas, produtores, provedores de tecnoloxía, centros de coñecemento e outros axentes do sector agrícola.

Smart Agri Connect 2026 é un programa internacional de encontros empresariais B2B orientado a impulsar novas oportunidades de cooperación comercial, tecnolóxica e de I+D+i no sector agrícola.

A iniciativa conecta nunha única plataforma de matchmaking dous importantes eventos europeos do sector: PotatoEurope 2026, que se celebra en Springe (Alemaña), e AgroTechniek Holland 2026, en Biddinghuizen (Países Baixos).

Entre o 9 e o 18 de setembro, as entidades participantes poderán programar reunións bilaterais de 20 minutos con potenciais clientes, provedores, distribuidores, socios tecnolóxicos, centros de coñecemento e outros axentes internacionais. O programa combina reunións presenciais durante as dúas feiras con encontros en liña, facilitando así a participación de empresas que non poidan desprazarse.

O encontro está especialmente dirixido a empresas e entidades que traballen en ámbitos como:

• maquinaria e equipamento agrícola;
• agricultura intelixente e de precisión;
• robótica e maquinaria autónoma;
• sensores, datos e solucións dixitais para a agricultura;
• intelixencia artificial e tecnoloxías de visión;
• xestión de solos, cultivos e auga;
• agricultura sostible e rexenerativa;
• procesamento e almacenamento de cultivos;
• distribución e acceso a mercados internacionais;
• investigación, innovación e transferencia de tecnoloxía;
• demostración, ensaio e validación de novas solucións.

A participación permite ás empresas presentar os seus produtos, servizos, tecnoloxías e intereses de cooperación, identificar socios internacionais e concertar previamente reunións cos participantes que resulten de maior interese.

A Axencia Galega de Innovación, como membro da Enterprise Europe Network a través de EEN-GalacteaPlus, participa como entidade coorganizadora e promoverá a participación de empresas e entidades galegas interesadas en establecer novas colaboracións internacionais.

Datas e modalidades

• 9 e 10 de setembro: encontros presenciais en PotatoEurope 2026 (Alemaña; o día 10 tamén hai opción en liña).
• 11, 14 e 15 de setembro: encontros B2B en liña.
• 16, 17 e 18 de setembro: encontros presenciais en AgroTechniek Holland 2026 (Países Baixos).