28
Xuñ

I Encontro de Deseño para a Innovación Empresarial

CIS Galicia

Engadir ao calendario

Título: I Encontro de Deseño para a Innovación Empresarial
Lugar: CIS Galicia, Ferrol
Data: 28/06/2018
Hora: 10:00 h – 18.00 h

A Consellería de Economía, Emprego e Industria, a través da Axencia Galega de innovación (GAIN), celebrou o pasado 28 de xuño o I Encontro de Deseño para a Innovación Empresarial.

O evento, que se celebrou no CIS Galicia (Ferrol), tivo como principal obxectivo abrir canles de contacto entre os profesionais do deseño e as empresas galegas, unha iniciativa que está a ter continuidade a través das múltiples accións contempladas no novo Programa de Deseño para a Innovación 2020.

Participaron no evento máis de 200 axentes do sector, desde deseñadores galegos de todos os ámbitos (industrial, gráfico, de produto, organizacional, dixital e multimedia) ata estudantes desta especialidade, pasando por representantes de empresas e outras entidades interesadas en potenciar o deseño como ferramenta de innovación e competitividade nas súas organizacións.

Os asistentes tiveron ocasión de coñecer, por unha parte, as últimas tendencias neste eido da man de deseñadores galegos, do resto de España e da escena internacional; pola outra, empresas líderes nos seus sectores de Galicia e foráneas expuxeron as súas experiencias máis exitosas de incorporación do deseño á súa estratexia de negocio.

As ponencias complementáronse con espazos expositivos no CIS Galicia nos que se fixo un percorrido por propostas de deseño que van desde os referentes históricos Luis Seoane e Isaac Díaz Pardo ata creacións contemporáneas.

Ademais, celebráronse reunións bilaterais previamente concertadas para cruzar ideas e necesidades entre deseñadores e empresas.

O encontro, que se celebrou con motivo do Día Mundial do Deseño Industrial, contou coa presenza do conselleiro de Economía, Emprego e Industria, Francisco Conde, e da directora da Axencia Galega de Innovación, Patricia Argerey.

  • Podes consultar o programa premendo aquí.