Imaxes do deseño galego
Galicia, imaxes do deseño é un proxecto promovido no marco do Programa Deseño para a Innovación 2020 e do Programa de Deseño para a Innovación e a Sustentabilidade 2024 – DIFERENZA co obxectivo de localizar, recuperar e difundir os principais fitos do deseño industrial galego a través da fotografía e de obras audiovisuais.
Os seus recursos están dispoñibles nunha plataforma online de libre acceso e aberta á participación dos usuarios rexistrados, que poden enriquecela con achegas propias.
O obxectivo deste proxecto é mellorar o coñecemento e a valoración do deseño galego como factor estratéxico de progreso ao longo da historia, así como ofrecerlles referentes ás empresas e emprendedores actuais.
A recuperación desta memoria histórica nun espazo dixital integrado aglutina fotografías e vídeos relacionados con ámbitos diversos: a enerxía, o mar, o naval, a industria tabacaleira, o transporte, etc.
A colección inicial está formada por un total de 400 imaxes cedidas por diferentes entidades.
- Arquivos e museos: Arquivo de Galicia – Biblioteca Dixital de Galicia, Arquivo do Reino de Galicia, Museo do Pobo Galego, Museo Anfaco de la Industria Conservera, Museo do Mar de Galicia, Museo da Construción Naval, Arquivo Zona Franca de Vigo, Proxecto Gentes del Mar, Museo Etnolóxico de Ribadavia, Museo do Coiro, Arquivo Histórico Provincial de Pontevedra, Centro Documental da Fundación Anastasio de Gracia.
- Empresas: UROVESA, Feiraco, Conservas Albo, Astilleros Cardama, La Pureza.