Institucións de acollida

O Programa Oportunius está aberto á incorporación a organismos de investigación de todo o Sistema de Ciencia e Innovación de Galicia.

Actualmente, as institucións de acollida son:

• A Universidade da Coruña [UDC]. Nacida en 1992, aglutina arredor de 140 grupos e unidades de investigación nos seus campus da Coruña e Ferrol. Desde o punto de vista da especialización, configurou ata o de agora tres campus temáticos: o Campus Innova o Campus da Sustentabilidade e o Campus Industrial, nos que destacan en termos de investigación:
  • Catro centros de investigación: Centro de Investigación TIC [CITIC] –acreditado como Centro de Investigación do SUG–, Centro de Investigacións Científicas Avanzadas [CICA], Centro de Innovación Tecnolóxica en Edificación e Enxeñaría Civil [CITEEC] e Centro de Investigacións Tecnolóxicas [CIT].
  • Seis institutos de investigación.

• A Universidade de Santiago de Compostela [USC]. Os seus máis de 500 anos de historia convértena nunha institución académica de referencia en toda Europa. Conta con cerca de 300 grupos de investigación repartidos nos seus centros de Santiago e Lugo. A súa estratexia de especialización materialízase no Campus de Excelencia Internacional Campus Vida, o Campus Terra e o emerxente Campus da Cidadanía. Neste marco, conta con:
  • Cinco centros singulares de investigación: Centro de Investigación en Medicina Molecular e Enfermidades Crónicas [CiMUS], Centro Singular de Investigación en Química Biolóxica e Materiais Moleculares [CiQUS], Centro Singular de Investigación en Tecnoloxías da Información [CiTIUS], Instituto Galego de Física de Altas Enerxías – IGFAE –acreditados como Centros de Investigación do SUG– e Cross-Research in Environmental Technologies [CRETUS].
  • Dez institutos de investigación.

• A Universidade de Vigo [Uvigo]. A súa xuventude (naceu en 1990) convive cunha traxectoria áxil que soubo evolucionar cara á especialización. Ademais de impulsar o Campus de Excelencia Campus do Mar, cada un dos seus tres campus está centrado nun ámbito: o Campus Vigo Tecnolóxico, o Campus da Auga de Ourense e o Campus CREA de Pontevedra. Entre todos eles suman 174 grupos de investigación, dos que os máis competitivos están integrados en:
  • Catro centros de investigación: Centro de Investigación en Tecnoloxías de Telecomunicación [atlanTTic], Centro de Investigación Mariña [CIM], Centro de Investigacións Biomédicas [CINBIO] –acreditados como Centros de Investigación do SUG– e o Centro de Investigación en Tecnoloxías, Enerxía e Procesos Industriais [CINTECX].
  • Unha agrupación estratéxica de investigación: Clúster de Investigación y Transferencia Agroalimentaria do Campus Agua [CITACA].

• Os tres Centros de Investigación Interuniversitarios do SUG:
  • Centro de Investigación Interuniversitario das Paisaxes Atlánticas Culturais [CISPAC, Santiago de Compostela]. Adícase á investigación sobre as paisaxes desde unha perspectiva multidisciplinar: traballa a paisaxe, o patrimonio e a produción dende a identidade, a participación e a sustentabilidade.
  • Centro de Investigación e Tecnoloxía Matemática de Galicia [CITMAga, Santiago de Compostela]. Integra as capacidades científicas máis competitivas das tres universidades galegas, no ámbito das Matemáticas, nunha axenda científica común cunha aposta pola transferencia de coñecemento.
  • Economics and Business Administration for Society [ECOBAS, Vigo]. Adícase á investigación no eido da sustentabilidade económica, ambiental e social para dar resposta aos retos e desafíos da sociedade.

• Os 5 centros de investigación do Consejo Superior de Investigaciones Científicas [CSIC] en Galicia. Segundo o Ranking SCIMago 2019, o CSIC é a primeira institución de investigación en España, a cuarta institución pública e a sexta pública ou privada de investigación en Europa occidental, así como a sétima institución pública mundial de investigación. En Galicia realiza investigación a través de:
  • Misión Biológica de Galicia (MBG, Santiago de Compostela e Pontevedra). Adícase á investigación xenética, agraria e forestal dos principais cultivos e especies leñosas de Galicia.
  • Instituto de Investigaciones Marinas (IIM, Vigo). Adícase á investigación integrada e multidisciplinar sobre o medio mariño e as especies mariñas.
  • Instituto de Estudios Gallegos Padre Sarmiento (IEGPS, mixto coa Xunta de Galicia, Santiago de Compostela). Adícase á investigación no ámbito da Historia, dende a Idade Media á Contemporánea.
  • Instituto de Ciencias del Patrimonio (INCIPIT) (Incipit, Santiago de Compostela). Adícase á investigación multidisciplinar do patrimonio cultural, a cadea de valor do patrimonio e os procesos patrimoniais.
  • Instituto Español de Oceanografía (IEO, A Coruña e Vigo). Adícase á investigación oceanográfica e dinámica dos ecosistemas mariños, á acuicultura e á avaliación de recursos pesqueiros.

Poderían ser tamén institucións de acollida de persoal investigador ERC:

• Os 3 institutos públicos de investigación sanitaria de Galicia.
• Outros organismos de investigación públicos e privados.