Conde destaca aos estudantes participantes en Galiciencia como os investigadores e emprendedores da Galicia do futuro

• O conselleiro de Economía e Industria destacou en Tecnópole a maior feira científica de Galicia como unha aposta polo talento científico e innovador dos máis novos
• Alumnos de toda Galicia expoñen 64 proxectos entre os que se atopan un helicóptero non tripulado contra incendios, unha app para aparcar ou unha nova forma de protexer os alimentos mediante ultrasóns
• Máis de 2.000 escolares visitarán ata o venres esta actividade de referencia da Semana da Ciencia en España

O conselleiro de Economía e Industria, Francisco Conde, destacou hoxe aos estudantes participantes na feira científica Galiciencia, que hoxe bota a andar no Parque Tecnolóxico de Galicia- Tecnópole como os “investigadores e emprendedores da Galicia do futuro”.

Conde salientou que Galiciencia, na que se poden ver 64 enxeños e proxectos de investigación de alumnos procedentes de toda Galicia, é unha aposta polo talento científico e innovador dos máis novos, ao tempo que reforza o posicionamento líder de Tecnópole no ámbito da divulgación da ciencia e a innovación, para o que contan co apoio da Xunta.

“Xuntos apostamos por inculcar a curiosidade, o emprendemento e a creatividade nos máis novos como vía para cimentar o futuro de Galicia no coñecemento e a na innovación”, subliñou o conselleiro de Economía e Industria. Lembrou así mesmo Conde que esta iniciativa é non só a feira científica máis importante de Galicia, senón tamén unha actividade de referencia a nivel nacional, seleccionada de novo entre as actividades destacadas pola Fundación Española para a Ciencia e a Tecnoloxía (FECYT) na Semana da Ciencia.

Galiciencia, que comezou hoxe e se prolongará ata o venres, recibirá a visita de máis de 2.000 escolares, que poderán ver proxectos como un helicóptero non tripulado para vixiar o lume dos montes, unha app para axudar a aparcar o coche ou unha nova forma de protexer os alimentos mediante ultrasóns. Aos equipos de estudantes de secundaria e de FP súmanse este ano proxectos de primaria, que protagonizan unha sección especial.

Ademais da exposición de proxectos, Galiciencia conta con actividades paralelas que inclúen talleres conmemorativos do Ano Internacional da Cristalografía e da Agricultura Familiar e do Ano da Biotecnoloxía en España, ademais da elaboración colectiva por parte de estudantes tanto do vídeo como da revista oficiais da Galiciencia.