Feijóo destaca o investimento de 10 millóns de euros para facer do Centro Tecnolóxico de Automoción de Galicia un referente europeo

• Salienta que o novo complexo é froito da unión da Xunta co sector do automóbil “para consolidar un campo de coñecemento moi especializado” a través “dunha infraestrutura tecnolóxica punteira en toda Europa”
• Resalta que o Centro de Excelencia ocupa a máis de 130 tecnólogos que traballan en varios edificios nunha área de 7.000 metros cadrados máis 15.000 metros cadrados de pistas, que inclúe talleres, laboratorios, espazos para o asentamento de empresas de I+D e unha área para probar os automóbiles que integran sistemas intelixentes
• Afirma que o centro sitúa Galicia “nunha posición de vantaxe competitiva” no mercado da automoción europea, ao especializarse nunha das áreas prioritarias da Estratexia da UE para 2020: un transporte integrado e intelixente
• Garante que a Xunta continuará apoiando o sector, como xa vén facendo ao achegar liquidez ás empresas en dificultades e ao potenciar a innovación a través do programa Interconecta
• Subliña que a automoción é unha das áreas prioritarias nas que a Xunta fomentará a I+D+i nos próximos sete anos de acordo coa Estratexia de Especialización Intelixente que presentará nas vindeiras semanas

O presidente da Xunta, Alberto Núñez Feijóo, puxo hoxe en valor o investimento de 10 millóns de euros na posta en marcha do Centro de Excelencia en Electrónica para Vehículos Intelixentes, do que dixo que aspira a converterse “nun referente europeo”. “O 90% da innovación do sector do automóbil moverase no eido da electrónica e do software e por iso en plena crise económica destinamos 10 millóns de euros para este centro; para que se converta nun centro de referencia a nivel europeo tanto en electrónica como en software para vehículos intelixentes”, destacou o titular do Goberno autonómico na súa visita ao Centro Tecnolóxico de Automoción de Galicia, que alberga o novo complexo, e onde traballan diariamente preto de 350 profesionais para ofrecer solucións avanzadas que reforcen a competitividade deste campo produtivo en Galicia.

O mandatario autonómico resaltou que o Centro de Excelencia en Electrónica para Vehículos Electrónicos do CTAG é froito da unión da Xunta co sector do automóbil “para consolidar un campo de coñecemento moi especializado no que a nosa Comunidade ten capacidades actuais recoñecidas e potencialidades futuras moi prometedoras”

Na súa intervención, Feijóo sinalou que poñer en marcha no Porriño “unha infraestrutura tecnolóxica punteira en toda Europa é unha aposta ambiciosa” que trata de activar un foco de coñecemento que arroxe resultados en dúas vertentes: en primeiro lugar, que a innovación exerza un “papel tractor de alto valor engadido que incremente a competitividade das empresas galegas da automoción”, comezando polo gran fabricante que é a PSA Peugeot-Citröen e continuando por todas as empresas auxiliares e polas iniciativas emprendedoras que se están a articular neste eido industrial.

En segundo lugar, o presidente da Xunta apuntou que o Centro de Excelencia en Electrónica para Vehículos Intelixentes traballará para xerar “I+D+i exportable en forma de patentes ou acordos de comercialización que se traduzan en retornos económicos para Galicia”.

Estas son dixo, as misións dos máis de 130 tecnólogos do cadro de persoal do CTAG que operan nos varios edificios que forman o novo complexo, repartido en varios edificios nunha área de 7.000 metros cadrados, aos que se suman pistas con outros 15.000 metros cadrados, e que inclúe talleres, laboratorios, bancos de ensaios e todo o necesario para a produción de novas tecnoloxías; espazos para o desenvolvemento de novas empresas de I+D+i de base tecnolóxica; e unha área de probas capaz de reproducir de maneira flexible diferentes contornos de condución para testar os automóbiles que integran sistemas intelixentes.

Para o titular da Xunta, o Centro de Excelencia en Electrónica para Vehículos Intelixentes sitúa Galicia “nunha posición de vantaxe competitiva” no mercado da automoción europea, posto que se trata dunha instalación tecnolóxica especializada nun dos obxectivos máis destacados dentro da Estratexia da UE para 2020: o desenvolvemento dun transporte integrado e intelixente, con vehículos máis seguros e máis sustentables.

“Para dar resposta a este reto, o sector da automoción ten a certeza de que seguirá avanzando acompañado da Administración autonómica”, asegurou Feijóo, quen lembrou que a Xunta ven inxectando liquidez ás empresas con dificultades durante a crise, a través das liñas de axuda do Igape, ao tempo que potencia o desenvolvemento da automoción, a través dos proxectos de innovación financiados co programa Interconecta. Tamén agora, subliñou, “a Xunta seguirá a ser un fiel aliado para a automoción galega”.

Unha aposta prioritaria na Estratexia de Especialización Intelixente

A ese respecto, destacou que a Estratexia de Especialización Intelixente de Galicia, a RIS 3, que constitúe a folla de ruta da innovación galega ata 2020 e que se presentará nas vindeiras semanas, “presta especial atención ao sector do automóbil” na Comunidade. O responsable do Goberno autonómico explicou que ese proxecto identifica as áreas prioritarias de I+D+i e inclúe “unha aposta determinante pola automoción” baseada no carácter estratéxico da súa industria e “no longo camiño xa percorrido en termos de coñecemento e tecnoloxía grazas ás universidades e centros como o CTAG”.

Así pois, sinalou que a mellora da competitividade e a diversificación da industria automobilística serán dúas das grandes metas da Xunta durante os vindeiros sete anos e garantiu que o Centro de Excelencia en Electrónica para Vehículos Intelixentes será un dos principais activos para acadalas.

O titular do Executivo autonómico resaltou a “vontade decidida de liderado” da automoción en Galicia, un sector que achega preto do 12% do PIB da Autonomía, que acapara máis de 19.000 empregos e supón case o 23% das exportacións da Comunidade. Xunto con isto, Feijóo salientou a súa resistencia contrastada fronte ás dificultades, esa que lle permitiu facer da crise un tempo de oportunidades no que seguir medrando e no que seguir innovando.