A Xunta anima en Arzúa a que as pemes aposten pola innovación, a dixitalización e a sostibilidade como elementos de diferenciación e competitividade

2022-04-11
  • A directora da Axencia Galega de Innovación, Patricia Argerey, e o director do Igape, Fernando Guldrís, participaron na xornada Camiño de futuro, que está a difundir en 14 localidades galegas os instrumentos de apoio ás empresas cos que conta a Administración autonómica
  • Dentro do Programa de Impulso á Innovación nas Pemes, activaranse este ano apoios por 12M€; no eido da dixitalización, neste segundo trimestre convocaranse axudas por 7M€; e o programa Galicia Emprende contará con 5M€

Arzúa (A Coruña), 11 de abril de 2022.- A directora da Axencia Galega de Innovación (Gain), Patricia Argerey, e o director do Igape, Fernando Guldrís, participaron hoxe en Arzúa na iniciativa Camiño de futuro, posta en marcha pola Xunta de Galicia co obxectivo de difundir entre as pequenas e medianas empresas de contornas non urbanas os instrumentos de apoio da Xunta de Galicia dirixidos a mellorar a súa competitividade e crecemento.

No encontro púxose de relevo o traballo da Administración autonómica para que cada vez sexan máis as pemes galegas que emprenden e escollen este camiño buscando o valor diferencial que achegan a innovación, a dixitalización e a sostibilidade, sinalando que a competitividade dunha empresa crece de forma proporcional ao que inviste en innovación.

No encontro celebrado en Arzúa técnicos de Gain e do Igape, así como do Grupo de Desolvemento Rural (GDR) Ulla, Tambre e Mandeo, explicaron as diferentes convocatorias de axuda activadas pola Xunta.

Así, entre outras iniciativas e convocatorias, informouse de que dentro do Programa de Impulso á Innovación nas Pemes, activaranse este ano apoios por 12 millóns de euros.

No eido da dixitalización, as convocatorias máis inmediatas neste segundo trimestre do ano suman 7 millóns de euros, coa previsión de mobilizar 13 millóns. No ámbito do emprendemento, no segundo trimestre do ano está previsto convocar as axudas do programa Galicia Emprende, con 5 millóns de euros, que se suman ao Galicia Rural Emprende, con 2 millóns de euros, que xa se convocou.

Xunto cos apoios económicos, desde o Goberno galego achéganse facilidades e axilízase a tramitación a través da Lei de simplificación administrativa e de apoio á reactivación económica de Galicia, que establece novos prazos e procedementos.

Unha das ferramentas que se puxo en marcha coa entrada en vigor desta lei é a Oficina Galicia Empresa, desde a que a Xunta atende ás empresas e aos novos proxectos empresariais que se queren asentar en Galicia, onde toman partido todos os departamentos da Administración autonómica. O obxectivo é facilitar o camiño aos emprendedores e ás empresas que queren desenvolver os seus proxectos en Galicia, restando tempos, carga burocrática e duplicidades na tramitación.

A xornada celebrada hoxe en Arzúa contou cunha mesa redonda de casos de éxito empresarial con pemes innovadoras da contorna procedentes de distintos sectores, que falaron da súa experiencia como beneficiarios de distintos instrumentos de apoio da Administración para que a empresa mellore a súa competitividade a todos os niveis. Neste caso, a cita con compañías innovadoras reuniu ás empresas Indupanel (Cerceda), líder español na fabricación de paneis de aluminio e PVC, e Toldos Gómez (Arzúa), referente na fabricación de lonas e carpas.

En total, Camiño de futuro acolle 14 encontros de networking por toda a xeografía galega. A seguinte parada terá lugar o martes 19 de abril en Ortigueira. A iniciativa, organizada pola Vicepresidencia segunda e Consellería de Economía, Empresa e Innovación, conta coa colaboración das consellerías do Medio Rural e do Mar, os grupos de desenvolvemento rural (GDR) e grupos de acción local pesqueira (GALP).

Camiño de futuro dá continuidade á iniciativa Camiño da innovación, unha das primeiras actuacións do Programa de Impulso á Innovación nas Pemes que ao longo dos meses de novembro e decembro pasados percorreu a través dun espazo itinerante un total de 18 localidades das catro provincias galegas, realizando máis de 240 asesoramentos a pemes galegas e asistindo máis de 550 persoas aos encontros. Máis información e inscrición neste enlace.