A Xunta de Galicia pon en valor en Málaga o ecosistema galego de I+D+i
2024-03-22
Bogotá (Colombia), 15 de marzo de 2022.- O vicepresidente económico e conselleiro de Economía, Empresa e Innovación, Francisco Conde, mantivo hoxe unha xuntanza co viceministro de Defensa do Goberno de Colombia, Gustavo Niño Furnieles, con quen abordou a posibilidade de abrir vías de colaboración no sector naval e aeroespacial.
Na reunión, o primeiro encontro institucional co que o vicepresidente económico abre a súa axenda de viaxe no país, tamén estivo representada a Corporación da Industria Aeronáutica Colombiana (CIAC) e a Corporación de Ciencia e Tecnoloxía para o Desenvolvemento da Industria Naval Marítima e Fluvial (Cotecmar).
Conde explicou que a xuntanza foi, en primeiro lugar, unha oportunidade para abordar as sinerxías que se poden dar entre a industria naval galega e colombiana, tendo en conta que hai más de 20 anos que Galicia leva proporcionado produtos e servizos, especialmente no eido da enxeñaría, a estaleiros e armadores daquel país.
O vicepresidente económico propuxo, ademais, que unha delegación de Cotecmar visite as instalacións do Centro de Excelencia do Sector Naval (Cesena) en Ferrol con vistas a abrir vías de intercambio, e que o naval colombiano participe en Navalia, que se celebrará en Vigo entre o 24 e 26 de maio. Tamén amosou a disposición do sector en Galicia a formalizar acordos con Cotecmar e outros estaleiros colombianos. Por outra banda, a reunión tamén serviu de ocasión para presentar ante o Goberno de Colombia o Polo Aeroespacial de Galicia e trasladar unha invitación formal para que unha delegación do país visite estas instalacións en Rozas (Castro de Rei).
Encontro empresarial Galicia-Colombia
Neste primeiro día de estancia en Bogotá, Conde tamén ten previsto participar nun encontro empresarial que contará coa presenza da ministra de Comercio, Industria e Turismo de Colombia, Ximena Lombana Villalba. Un encontro para poñer en valor o potencial que en Galicia teñen sectores como o naval, o TIC e o contract, así como a aposta que a Xunta está a facer polo binomio industria-sustentabilidade e por dar a máxima confianza e facilidades administrativas ás empresas para atraer investimentos.
Nun ano récord de vendas ao exterior como foi o 2021, no que Galicia superou por primeira vez a barreira dos 25.000 millóns de euros, Colombia ocupa neste momento o sétimo posto nas vendas galegas a Latinoamérica, con 632 empresas exportadoras, un 36 por cento máis que en 2020.
Reunión coa ministra das TIC
O vicepresidente económico rematará a xornada cunha xuntanza coa ministra de Tecnoloxías da Información e as Comunicacións de Colombia, Carmen Ligia Valderrama, a quen lle proporá crear un comité de expertos TIC Galicia-Colombia que analice vías de traballo conxunto e intercambio en áreas nas que Galicia xa ten avances significativos. É o caso das solucións TIC desenvolvidas pola Xunta no ámbito da administración pública e a sanidade, coa receita electrónica ou a historia clínica.
Conde explicou que o sector TIC é moi importante nesta misión comercial polas oportunidades de crecemento que existen e por ser Medellín un ecosistema de referencia internacional onde a Xunta —a través da Axencia Galega de Innovación (Gain)— xa organizou en 2019 o Foro de Compra Pública Innovadora. Por iso, adiantou que tamén ofrecerá ao Ministerio TIC de Colombia participar en proxectos como o Polo Aeroespacial de Galicia ou a Cidade das TIC.