A Xunta de Galicia asegura que o deseño sairá reforzado na era poscovid-19 como ferramenta de transformación e competitividade

2020-07-23
  • A directora da Axencia Galega de Innovación, Patricia Argerey, abriu esta mañá o segundo encontro virtual do ciclo ‘A era poscovid: redeseñar o mundo’
  • No encontro, profesionais galegos de recoñecido prestixio internacional exploraron a relación entre deseño, ciencia e tecnoloxía na era poscovid-19

Santiago de Compostela, 23 de xullo de 2020.- A directora da Axencia Galega de Innovación (Gain) dependente da Consellería de Economía, Emprego e Industria, Patricia Argerey, interveu esta mañá na apertura institucional do segundo encontro virtual do ciclo A era poscovid: redeseñar o mundo. Neste contexto, Argerey afirmou que o deseño sairá reforzado desta situación xerada pola pandemia gañando relevancia, en tanto que ferramenta facilitadora da transformación da ciencia e da tecnoloxía en innovación e, polo tanto, da competitividade económica e do benestar social.

Neste senso, a directora de Gain destacou o potencial do deseño galego e dos seus profesionais para axudar ás empresas, sobre todo ás pemes, a aproveitar oportunidades como a dixitalización, que se ten revelado tan necesaria no contexto actual, e puxo como exemplo os numerosos deseños industriais que xurdiron a raíz da crise sanitaria para dar resposta ás necesidades básicas das persoas.

Precisamente, a interacción entre deseño, ciencia e tecnoloxía, un trinomio que forma parte da esencia do Programa de Deseño para a Innovación 2020 da Xunta, foi o eixe arredor do que xirou este segundo encontro, nun escenario marcado pola incerteza e por novos retos e necesidades, completando así a reflexión iniciada no primeiro encontro do ciclo, no que se analizou a relación entre deseño, empresa e sociedade.

A visión experta de tres profesionais galegos

Neste segundo encontro, participaron tres profesionais galegos de referencia internacional que compartiron a súa visión sobre a relación deseño, ciencia e tecnoloxía con representantes de empresas e centros tecnolóxicos. Os relatores foron o artista Rubén Ramos Balsa, residente en Singapur e fundador da empresa tecnolóxica Mismos; Noemí Cortizas, afincada en Francia e especializada no deseño de produto, materiais, acabados e cores nas compañías Roctool e Ydemaker; e Anxo López, experto na función estratéxica do deseño e líder desta división no BBVA.

A visión destes tres expertos está recollida tamén na publicación Futuros posibles: Deseño para a innovación na era poscovid, editada pola Xunta co obxectivo de compartir coñecemento arredor do desen?o como ferramenta estrate?xica na etapa que abriu a pandemia do coronavirus para contribuír á posta en marcha en Galicia de equipos multidisciplinares capaces de xerar competitividade empresarial a trave?s da innovacio?n nacida do desen?o.

Desde Singapur, Ramos Balsa destacou que a arte ten un papel fundamental na tecnoloxía, non é un mero produto da ciencia, e que o deseño ten a capacidade transversal de unificar o campo analítico ligado á ciencia e o máis aleatorio ligado á arte. Ademais, expuxo que a era poscovid-19, co seu compoñente de crise, é un espazo idóneo para que a arte lle permita á tecnoloxía e á innovación ir máis alá do contexto de certeza que precisa a ciencia.

Pola súa banda, Cortizas puxo en valor a súa especialidade explicando que a combinación entre cor, materiais e acabado permite darlle ao produto un carácter único e xerar no consumidor a percepción e as emocións desexadas. Entre as tendencias máis destacadas neste campo, salientou a sustentabilidade –mediante bioplásticos, materiais compostos e reciclados e procesos máis eficientes–; a autenticidade para ofrecer a paz mental e o benestar asociados ao consumo responsable; e a personalización para reforzar a identidade do consumidor.

Animar as empresas máis pequenas a contemplar o deseño como unha ferramenta moi útil para xerar valor estratéxico e competitividade foi o eixe do relatorio de Anxo López, que defendeu que non só é algo ao alcance das grandes empresas, xa que permite solucionar problemas e, sobre todo, orientarse ás persoas. Ademais, sinalou que aínda que a dixitalización veu para quedar hai que ser capaces de deseñar os servizos sen deixar a ninguén fóra, que realmente sexan facilitadores e non obstáculos.

Próximas citas co deseño

A directora de Gain anunciou que o ciclo A era poscovid. Redeseñar o mundo continuará o 25 de setembro cun novo encontro centrado no deseño de novos espazos como tema principal.

Así mesmo, informou da apertura de inscricións ao ciclo Materiais para o futuro, ligado á Materioteca de Galicia. O primeiro dos catro workshops online deste ciclo terá lugar o 10 de setembro coa presentación de novos materiais hixiénico-sanitarios creados por empresas galegas como resposta á crise do coronavirus. Durante a xornada presentarase tamén a nova base de datos da Materioteca de Galicia, na que se poderán consultar en detalle as características e aplicacións desta mostra de materiais innovadores con selo galego.