A Xunta de Galicia pon en valor en Málaga o ecosistema galego de I+D+i
2024-03-22
Vigo, 19 de febreiro de 2020.- A directora da Axencia Galega de Innovación (Gain), Patricia Argerey, visitou esta mañá a empresa viguesa O Lecer Sénior Care, dedicada á asistencia a persoas maiores en centros residenciais, e que actualmente está desenvolvendo un plan de innovación co apoio da Xunta a través da convocatoria de 2019 do programa InnovaPeme.
Tal e como informou Patricia Argerey durante a visita, hoxe publícase no Diario Oficial de Galicia a convocatoria de axudas do Innova Peme 2020, dotada con 2,7 millóns de euros e destinada especificamente a micro, pequenas e medianas empresas galegas que precisan apoio para sistematizar, potenciar ou desenvolver a súa actividade innovadora. O obxectivo é que aumenten a súa competitividade e tamaño do mercado a través da introdución de novos produtos e servizos ao abeiro dos plans de innovación; e fomentar o investimento privado en I+D en Galicia, a transferencia de tecnoloxía e a innovación aberta e colaborativa.
InnovaPeme 2020, cofinanciado con Fondos FEDER no marco do programa operativo Feder Galicia 2014-2020, apoia as actuacións recollidas nun plan de innovación, que se desenvolverá durante un período mínimo dun ano. A intensidade da axuda será do 50% do orzamento subvencionable (que deberá estar entre 80.000 e 200.000 euros) e, ademais, as empresas beneficiarias poderán solicitar acompañamento posterior para a comercialización e industrialización da innovación a través de fondos de capital risco vencellados á innovación xestionados por XesGalicia.
O prazo de presentación de solicitudes é de dous meses e remata o 20 de abril ás 13 horas. Entre as principais novidades, refórzase como criterio de valoración o feito de ser unha microempresa e non ter obtido axudas á I+D+i nos últimos 3 anos. Ademais, só se valorarán os contratos a tempo completo cunhas retribucións nas que corresponda o grupo de cotización coa titulación da persoa contratada.
Así mesmo, nesta edición, inclúense unha serie de cláusulas sociais como a incorporación da innovación responsable e do compromiso social como criterios de valoración da convocatoria e relacionadas coa estratexia de apoio ás pemes como obrigas de formación e de subministración de información.
Durante a súa visita a O Lecer Sénior Care, a directora de Gain destacou a utilidade social da innovación, que non só contribúe a asegurar un crecemento económico sostible senón a ofrecer solucións ás demandas da sociedade actual e contribuír a mellorar a calidade de vida das persoas, como neste caso en que o plan de innovación está encamiñado a ofrecer unha atención máis centrada nas persoas, tanto nos maiores, como nos coidadores e as súas familias.
Precisamente o envellecemento activo e a mellora da calidade de vida das persoas, especialmente as persoas maiores, é un dos retos da Estratexia de Especialización Intelixente de Galicia (RIS3) na que se enmarca esta liña de axudas e coa que se aliña o plan de innovación de O Lecer.
A empresa aspira a converterse nun referente na posta en marcha de técnicas asistenciais centradas nas persoas e a expandir o seu modelo de atención a maiores a centros doutras localidades galegas e españolas. Para iso, conta coa colaboración do grupo de investigación de referencia da Universidade de Vigo REDE, que achega a súa experiencia en servizos de apoio en materia de innovación social no envellecemento activo, e cos servizos da empresa Triple Alpha Innovation, que presta apoio na dixitalización dos procesos na atención residencial sénior.
Argerey subliñou precisamente a importancia desta colaboración con organismos de investigación e empresas provedoras de servizos tecnolóxicos avanzados, xa que permite aproveitar as capacidades e experiencia do resto de axentes do Sistema galego de innovación e potenciar a innovación colaborativa.