Iniciativas de recoñecemento ao deseño

O programa DIFERENZA contempla o recoñecemento ás mellores iniciativas do deseño galego como unha vía estratéxica para reforzar e promocionar o esforzo dos seus profesionais e a proxección do seu traballo.

Este eixe de actuación prioriza a colaboración coas entidades de referencia no sector e tamén está aberto á posta en marcha de iniciativas propias.

Premios Galicia de Innovación e Deseño

Os Premios Galicia de Innovación e Deseño naceron en 2020 como unha iniciativa da Xunta de Galicia, a través da Axencia Galega de Innovación, para recoñecer o labor das persoas e empresas que están a contribuír significativamente ao desenvolvememento económico e social en Galicia a través da innovación e o deseño.

Toda a información dispoñible aquí.

Premios Paraugas

A colaboración cos Premios da Comunicación e do Márketing de Galicia, os Premios Paraugas, comezou en 2018.

A Axencia Galega de Innovación patrocina a categoría de deseño destes galardóns, organizados polo Clúster de Comunicación de Galicia.

Porto Design Biennale

Desde a súa primeira edición en 2019, o programa de apoio ao deseño galego estivo representado na Porto Design Biennale, que xa se converteu nunha cita de referencia a nivel europeo. 

Na súa primeira edición, a Porto Design Biennale contou cunha exposición de deseño galego, que contribuíu non só á proxección internacional dos seus profesionais senón tamén á apertura de novas oportunidades de colaboración entre Galicia e Portugal para impulsar o deseño como ferramenta de innovación e competitividade.

Esta relación intensificouse na segunda edición da bienal, coa celebración do encontro transfronteirizo “Materia e Territorio”, que serviu para comezar a explorar a oportunidade compartida que Galicia e o Norte de Portugal teñen de liderar o desenvolvemento de novos modelos económicos baseados na sustentabilidade e na circularidade a través do deseño de materiais concibidos para rexenerar. Ademais, a exposición Arquivo da Matéria Viva, inaugurada en Matosinhos con motivo da Porto Design Biennale, deu o salto a Galicia a través do programa DIFERENZA para permanecer aberta durante un mes no CIS Tecnoloxía e Deseño.