A iniciativa Deseño & Empresa céntrase en impulsar o investimento en deseño por parte das empresas galegas e en capacitalas para a súa aplicación á innovación en novos produtos e servizos, procesos e estratexias de negocio.
Mediante esta iniciativa, o Programa de Deseño para a Innovación e a Sustentabilidade 2024 – DIFERENZA estimula e acompaña o establecemento de relacións produtivas entre empresas e profesionais do deseño.
As primeiras accións, ás que se lle dará continuidade, consistiron nunha serie de proxectos piloto sectoriais. O seu obxectivo é identificar necesidades e oportunidades capaces de xerar colaboracións entre os axentes do ecosistema de deseño e innovación para comercializar con éxito produtos e servizos que atendan as novas esixencias do mercado a través da aplicación do pensamento e a práctica do deseño.
Para a realización dos primeiros proxectos piloto a Axencia Galega de Innovación countou coa colaboración do Clúster Alimentario de Galicia, o Clúster da Pizarra de Galicia e o Clúster do Granito.
No marco destes proxectos, aplicouse a metodoloxía descrita a produtos derivados do granito e a lousa —ámbitos da construción e do equipamento do espazo urbano, contract, doméstico, etc.–, así como da industria alimentaria — novas solucións de embalaxe, conservación, transporte, etc–.